Ich mag mich na so guet a die Standard-Frogeböge erinnere us de Lehr, wo d'Mitarbeiter nach Sozial-, Fach- und Methodekompetenz bewertet worde sind. Scho damals het mir mini Lehrmeischterin gseit, dass Sozialkompetenz mini Stärchi isch und ich glaub, das isch wahrschindli fascht mini gröscht Stärchi. Ich cha einigi Sache guet, aber wür jetzt behaupte nüt chani so würkli richtig guet :D. Geschter bi mim "Praktikum" het mich en Typ gfroget, was ich denn brueflich mache... phuuuu schwierigi Frag, mengisch weiss ich's sogar selber nöd richtig. Am Schluss het er zu mir gseit "also eigetli bisch du e Allrounderin" und luschtigerwies isch au das de Satz, won ich uf minre Website druf han. Ich glaub i bi scho mis lebe lang Allrounderin und das chunt mir jetzt als Mami au recht z'guet. Obwohl ich mengisch scho gern chli besser würd chöne choche, butze, Gschichtli verzelle und Co.
Uf em zweite Slide hender Merkmal vo Sozialkompetenz und da gits zwei Pünkt, wo trotzdem eher e Schwächi sind: Kommunikation. Grad schwierigi Gspröch sind für mich wie scho gseit SCHWIERIG :D. Ich ha nöd gern Konflikt und gah drum dem au oft us em Weg. Han i letschter Zit aber einigi Büecher, Podcasts und Biträg glese und gmerkt, das chan mer definitiv lerne, meh muss sich nur chli en Arschtritt geh. S'zweite isch: Selbstregulation. Ich bin öper, wo sehr emotional chan reagiere. Geschter Abig z.B. hets es Mami debi gha, wo ihre erscht Hockey Match cho isch ga luege und ganz ehrlich, i ha sie so herzig gfunde, dass mir grad chli Träne id Auge gschosse sind. Isch jetzt au nöd mega schlimm, aber die Emotionalsite hani nöd immer under Kontrolle. Wie gsehts bi eu us? Han es paar Frage i de Story vorbereitet ;).
Comentários