Nutzwertanalyse - Es Tool, wo ich super gern isetze zum Entscheidige z'treffe. Ich ha mini Google Drive Ordner ufgrumt und bin drum wieder druf gstosse, will ich das vor es paar Jahr mitre Kollegin gmacht han, wo sie nöd sicher gsi isch, welle Job sie sell aneh und siehe da, sie isch immerna glücklich i dem Job, wo au damals am meischte Pünkt i de Bewertig becho het.
Ich ha das früener sogar gmacht, wenni mir unsicher gsi bin, obi mitme Typ sell zeme cho oder nöd :P. Wenn du also e schwierigi Entscheidig vor dir hesch, denn gah wie folgt vor:
1 - Leg verschiedeni Kriterie fescht für d'Entscheidig
2 - Due die Kriterie gwichte (Mach ich immer vo 1-10, also wie wichtig isch mir das Kriterium vo 1-10)
3 - Bewert dini Alternative ahand vo dene Kriterie (Ebenfalls vo 1-10)
4 - Multiplizier d'Gwichtig vo dim Kriterium mit dinre Bewertig
5 - Zell all Pünkt zeme
6 - Triff dini Entscheidig
Falls öper kei Ahnig het, vo was ich red, aber so öpis gern würd usprobiere: Ich han fixfertigi Vorlage erstellt, wos eim alles grad duet usrechne ;), eifach melde!
Praxisbeispiel Youtube als Marketinginstrument
Ganz ehrlich, mini Skills i Sache Videos ufneh, schniede und Co. sind sehr tüf. Aber ich han scho länger Lust gha, Youtube Videos z'produziere. Und "probierä gaht bekanntlich über studiere" wie min Papi immer gseit het, drum han ich min Post zum Thema Nutzwertanalyse als Tutorial erstellt ;).
Ufwand und Ertrag isch sehr fraglich, vor allem will i mi immerna muss drifuxe. Aber da's um Nutzwertanalyse gaht, hani das grad als Bispiel gnoh ;). Für all, wo sich für das Thema interessieret, aber kei Ahnig hend, wie mer so e Nutzwertanalyse macht, chönt das genau s'richtige si.
Triggerwarnig für all, wo Videos produzieret: Qualität isch tüf :P!
Comentários