Frage: Welli Frau gaht scho gern zum Frauearzt :D? He ohni Witz, und das mein ich jetzt richtig ernscht: Sit em erschte Termin bi de neue Gynäkologiepraxis @frauenpraxis66 bin ich's! Ich finds sogar richtig schad, dass bi mir kei Chind meh git, woni "mit ihre zeme" chönd gebähre :D.
Im Toggi bini mega selte zum Frauearzt und det isch mer eifach zu de Frau H. gange, wills susch niemer gross geh het (ich ha jetzt na Kolleginne, wo zu ihre gönd :D), in Rappi bini denn jahrelang zume Frauearzt gange, woni mal im Body Pump kenne glernt ha und er isch halt eifach en 0815 Frauearzt gsi - muss ja au nüt schlechts heisse und fachlich isch er sicher top gsi, aber ich ha mi nie uf de Termin gfreut, es isch aber au nöd mega schlimm gsi. Ich bi währet beidne Schwangerschafte immer bi ihm gsi (das isch eigetli die Zit, wod als Frau soviel bim Frauearzt bisch wie nie) und au döt isch es ok gsi, aber jetzt au nöd mega emotional :D.
Und jetzt isch es so, dass ich de Arzt sowieso ha müsse wechsle, denn hani zerscht is grössere Ärztezentrum in Rappi-Jona aglüte, döt hends niemer meh ufgnoh und denn hani denkt ich google mal und bi direkt uf d'Frauenpraxis66 gstosse. Zum Glück!
Erschte Idruck: cooli Website, moderne Uftrit, gueti Föteli vo de Ärztin und de Praxisassistentin und de absoluti Oberpluspunkt: meh chan online en Termin bueche. Hani na nie gseh bime Frauearzt! Nachher isch de besagti Termin cho: Bim Tüchiparkplatz parkiert, über d'Strass und direkt bim neue Moxyhotel isch Praxis. De Igangsbereich stilvoll ohni grosse Schnickschnack aber voll modern. Mega herzlichi Begrüessig am Empfang und denn hani im Warteruum chöne übers IPad mini Date erfasse. Nachher het mich d'Frau Odermatt is Zimmer gholt und ich bi vo Afang a mega begeisteret gsi. Sie het sich so für mich und min Körper interessiert, ha mi voll ernschtgnoh gfühlt und es het eifach gmatcht zwüschet üs (tönt chli wie bime Date :D, aber ihr wüsset, wie ichs meine ;)). Au de Untersuech an sich het überhaupt nöd weh due. Ha na nie so en guete Arzttermin gha und cha sie jedere Frau vo ganzem Herze empfehle, will das söt für mich eifach Standard si. Luschtigerwies hani die letschti erfahre, dass e gueti Goldenbody-Chundin demnegscht als Praxisassistentin döt afangt, was natürli grad namel es Highlight isch.
Comments