Wer mich kennt weiss, ich bin für alles z'ha :P. Geschter Mittag het mir mini lieb Kollegin gschriebe, ob ich Luscht han, am Abig im Gastro uszhelfe. Sie het bime Ice Hockey Club d'Leitig für de Gastroberich und isch immer froh, wenn sie gnueg Springer het. Mini letscht Gastroerfahrig isch ime Berggasthuus gsi, won ich na en Teenie gsi bin, wo mir irgend so en Skifahr-Volldepp extra de Fuess in Weg gstellt het und ich mit vier Portione Älplermagronen dur de ganz Gang gfloge bin :D.
Mini Fach- und Methodekompetenz i dere Branche isch definitiv usbaufähig, aber en Grossteil macht bi somne Job am Schluss doch Sozialkompetenz :D?!?! Am halbi 6i hani müsse itrudle, denn hend mir e halb Stund ifüerig gha und am 6i sind d'Gäscht cho.
Ich bin liecht nervös gsi, willi gwüsst han, es sind wichtigi Gäscht und ich ha min Job welle guet mache und mini Fründin nöd endtüsche :P. Ich han i dene 7 Stund sehr viel erlebt: einigi Patzer, ha mini Kollegin vonre ganz andre Site kenne glernt und zwei Type, wo mich echt begeisteret hend. Und all das gits i de hütige Podcastfolg. A nöd z'vergesse: Ich ha sogar en chline Mobbingvorfall erlebt, wo mir grad e witeri Story in Sinn cho isch ;).
Die zwei Type, wo mich begeisteret hend, sind üsi Gäscht gsi und zwar gahts um d'Firma fidro. Ihri Branche isch grundsätzlich eher öpis, wo mich liecht awiederet (nei es isch keis Schmudelbusiness, es gaht um d'Versicherigsbranche ;)). Bevor sie de Ruum betrete hend, han ich gseh, sie sind en grosse Sponsoringpartner. Ich ha Manne zwüschet 40gi und 60gi erwartet, was denn absolut nöd de Fall gsi isch :D. Sie hend zu dem gestrige Event Mitarbeiter, Chunde und Partner iglade und währet ihrem Ufenthalt han ich sehr viel cooli Gspröch chöne füere und ganz viel verschiedeni Sichtwiese ghört. Eis Gspröch mit em Gründer Dario, het mich vo de Istellig total beidruckt und wer weiss, viellicht git er mir sogar mal na es Interview ;). Geschter het er uf jede Fall ja gseit :P.
Commentaires